Horta-Lasama Halo Konferensia Imprensa. "Rogerio Lobato, Tilman Ho KHUNTO Deklara Apoiu Lú-Olo"

Jornal INDEPENDENTE
Kuarta, 21 Marsu 2012

Ohin, Horta-Lasama Halo Konferensia Imprensa Konjunta

“Tilman Ho KHUNTO Deklara Apoiu Lú-Olo, Rogerio Lobato Lampu Hijau Apoiu Lú-Olo”

Kandidatu Prezidenti Repúblika ba periodu 2012-2017, Manuel Tilman no Vise Prezidenti Partidu KHUNTO deklara hodi fo’o apoiu tomak ba kandidatu Francisco Guterres Lú-olo.


Entertantu, ohin (21/03) kandidatu nain 2, Fernando Lasama de Araujo no Jose Ramos Horta halo konferensia imprensa konjunta atu hato’o sira nia pozisaun.

Ba kestaun ne’e, Tilman dehan, nia apoiu Lú-Olo tanba nu’udar Prezidenti Partidu KOTA ne’ebe sempre suporta FRETILIN iha PN.

“Ami Partidu KOTA sempre apoiu FRETILIN iha tempu susar, iha eleisaun 2007 Lú-Olo lakon, ami mos lakon,” dehan Manuel Tilman.

Nune’e mos, Vise Prezidenti KHUNTO, Olinda Guterres, halo nia vizita ba Edifisiu Ekipa Susesu Kandidatu Lú-Olo

“Hau mai hasoru Sr. Lú-Olo lansung atu bele halo nusa karik ami nia apoiu ba kandidatu Lú-Olo nian, hau mai ona ne’e hatudu katak lo’os ona,” dehan Olinda.

Olinda dehan, nia fila sei deskute ho estrutura KHUNTO molok halo deklarasaun ofisial kona ba pozisaun partidu KHUNTO nian.

Ba kestaun ne’e, Vise Prezidenti Partidu Istoriku FRETILIN Arsenio Bano dehan, kandidatu Rogerio Lobato mos hatudu ona lampu(ahi-oan) verde hodi fo apoiu ba kandidatu Lú-Olo iha Eleisaun segundu ronde tanba Rogerio Lobato ema FRETILIN. Bano dehan, ekipa susesu Lú-Olo mos halo hela kontaktu ho partidu no kandidatu sira seluk ne’ebe lakon iha primeiru ronde atu bele suporta kandidatu Lú-Olo iha segundu ronde.

Iha parte seluk, kuarta ohin (21/02) kandidatu Fernando Lasama de Araujo no Kandidatu Dr. Jose Ramos Horta atu halo konferensia da imprensa konjunta iha Hotel Timor.

Tuir informasaun katak, iha konferensia ne’e sei hato’o sira nia pozisaun ba eleisaun segundu ronde, maibe atu apoiu ka lae, ou hili dalan independente, ne’e seidauk klaru.